XUNTANZA CLUB DE LECTURA MAMÁ, QUERO SER ZIGGY STARDUST

Tal como quedou acordado na última reunión polos compoñentes do Club de lectura Papel e tinta, iremos lendo o libro de Iria Misa, Mamá quero ser Ziggy Stardust, para poñelo en común o vindeiro 13 de febreiro.

Moito ánimo e agardamos que gocedes con esta fantástica historia!

Encontro dos libros La dentista demonio e Estudio en escarlata

Onte, 19 de decembro, o alumnado de 1º e 2º ESO puxo en común a lectura do libro La dentista demonio. Para o vindeiro encontro leremos Mamá, quero ser Ziggy Stardust de Iria Misa.

Deixámosvos algunha fotografía e opinións do alumnado de 1º e 2º e a profe Pilar que están fotografando o momento. Xa vedes que nos nosos encontros temos unhas pequenas larpeiradas para saborear a lectura.

"A min o libro da dentista demonio sinceramente gustoume moito, porque é do tipo de libros que me gustan." Cora Buján Rouco. 

"La dentista demonio gustoume bastante xa que é moi entretido, divertido, e enténdese perfectamente, a escrita é moi clara." Eva Louzao Casas. 

"Esta historia, narrada por David Walliams, encantoume pola imaxinación que empregou ao narrala, é moi orixinal e foi por iso polo que me gustou tanto." Miguel Fra Baltar. 

 

"La dentista demonio gustoume moito, porque me pareceu un libro co que se poden botar unhas risas, mentres gozas da lectura, ademais era moi fácil de ler xa que utilizaba unha linguaxe sinxela". Enma Buján Rouco.

“A lectura pareceume entretida, pero considero que a temática está tratada dun xeito pouco apropiada, xa que os/as nenos/-as e adolescentes acostuman a terlle medo ir á consulta da dentista e tal como se presenta esta profesional, pode provocar aínda un temor maior”. A profe e directora Sara Jul

Tamén vos deixamos unha fotografía do encontro de dúas alumnas de 4º ESO e as profes de Historia, Sara Nóvoa, e a Xefa de Estudos, Dulce, no que falaron do libro Estudio en escarlata. Charo, a moderadora, está inmortalizando o momento.

"Eu, persoalmente, nunca lera ningún libro de Arthur Conan Doyle ata que lin Estudio en Escarlata, polo que non lera ningunha novela de Sherlock Holmes. Pareceume un libro moi interesante, que me fixo aumentar a miña curiosidade polos libros de misterio. Ademais, que fose o primeiro da colección serviume para poder coñecer mellor aos protagonistas do libro". Paula Díaz. 

 

"Estudio en escarlata: Foi un libro co que disfrutei, non só pola historia de misterio que me tivo intrigada ata o final ,senón tamén polo tipo de redacción,moi elegante e  coidada e con descricións moi concisas." A profe Charo Canoura.

 

 "Estudio en Scarlata: a verdade é que nunca lera nada deste autor e gustoume moito. Tívome moi entretida, engancha. Os  dous personaxes principais son moi interesantes e compleméntanse á perfección. Sen dúbida, moi recomendable para os nosos alumnos." A profe Sara Nóvoa.

La dentista demonio

1ª xuntanza Club de Lectura Papel e tinta

O vindeiro día 19 de decembro o alumnado de 1º e 2º ESO porá en común a lectura do libro La dentista demonio de David Walliams, será ás 10:30h na sala de Audiovisuais. A moderadora será Pilar, a profe de Lingua Galega.

Mentres a rapazada de 3º e 4º porá en común a lectura de Estudio en escarlata de Arthur Conan Doyle, ás 10:30h na Biblioteca. A moderadora será Charo, a profe de Matemáticas.

 

ENCONTRO LITERARIO CON JORDI SIERRA I FABRA

O Teatro Pastor Díaz de Viveiro foi o escenario o pasado mércores, día 30 de outubro, do encontro literario con Jordi Sierra i Fabra ao que asistiu o alumnado de 4º ESO do Ies Illa de Sarón en colaboración co Ies María Sarmiento. Jordi Sierra i Fabra é autor de infinidade de libros que nos últimos meses nos cativou cun vídeo sobre a súa propia estadía na escola. 

Entre os inmumerables libros de literatura infantil e xuvenil que ten publicados destacamos:

• El asesinato del profesor de matemáticas.(2002)
• El asesinato de la profesora de lengua. (2007)
• El club de los raros. (2015).
• Querido hijo, estás despedido. (2016)
• Campos de fresas. (2017)
• El detective.(2019)

Posúe máis de 50 galardóns e premios. Recentemente obtivo o Premio Lazarillo 2019 pola súa obra Como lágrimas en la lluvia.

Se queres ver o extraordinario vídeo de BBVA Aprendemos juntos, onde Jordi Sierra i Gabra explica a súa propia experiencia, pica aquí: "Leer me salvó la vida, escribir le dio un sentido"

CELEBRACIÓN DO SAMAÍN

Nos últimos días o alumnado da ESO estivo a redactar os seus relatos de terror, medo ou intriga para celebrarmos o SAMAÍN. Convocamos un concurso no que as/os gañadoras /-es ademais de levaren un diploma acreditativo, acadaron doces elaborados polo alumnado de 4ºESO e un agasallo sorpresa.

Parabéns ás/aos gañadoras/-es!!

Participantes do Club de Lectura

O resultado da reunión do pasado venres foi moi satisfactorio. 

Participamos un total de 11 alumnos e alumnas de 1º e 2º ESO e 6 de 3º e 4º ESO e entre o profesorado asistiron 10 profes/-as, así que imos pensar nos libros para ler e nun logotipo para o club. A profesora moderadora do grupo de 3º e 4º ESO será Rosario Canoura e a do grupo de 1º e 2º ESO, Pilar López

Seguiremos informando.

ENCONTRO LITERARIO COA ESCRITORA IRENE REGA JUL

O pasado 30 de setembro o alumnado de 1º ESO tivo ocasión de escoitar, na Biblioteca do centro, a escritora Irene Rega Jul, autora de Si me pierdo, tú me encuentras y Si me pierdo, búscame. Ao finalizar a charla, o alumnado puido formularlle todo tipo de preguntas e curiosidades acerca do proceso da escrita.

Irene Rega Jul (San Cibrao, 1996), como ela mesma di, medrou nun fogar cheo de libros e de lectores que lle inculcaron esta afección dende moi pequena. Dende nena gustoulle ler libros e crear as súas historias a partir da súa lectura, para, pouco  a pouco, pasar a inventar as súas propias historias.

Libros publicados de Irene Rega Jul 

 

Fotos do encontro: